ពុទ្ធកិច្ច ៥ យ៉ាង

          យើងខ្ញុំបរិស័ទ                    ពុទ្ធសាសនា      

        ឱនកាយវាចា                      ចិត្តគោរព

        ចំពោះព្រះពុទ្ធ                     ដែលជាម្លប់       

        គ្រប់គ្នាត្រូវចាំ                     ឲ្យទៀងទាត់។

        ចងចាំថ្ងៃខែ                       ឲ្យបានច្បាស់    

        នៃព្រះគុណម្ចាស់                 គឺប្រវត្តិ

        សង្ខេបខ្លីៗ                        ឲ្យរត់មាត់         

        កំណត់ចាំបាន                    ពេលទាំងអស់។

        យាងចុះកាន់គភ៌                  ឆ្នាំរកា    

        អាសាឍមាសា                   ថ្ងៃព្រហស្បតិ៍

        ប្រសូតឆ្នាំច                        ថ្ងៃសុក្រស្មោះ    

        ពិសាខឈើលាស់                ដើមរដូវ ។

        សោយរាជ្យកត្តិក                 ថ្ងៃអាទិត្យ         

        ប្រជុំព្រាហ្មណ៍                    ព្រឹទ្ធនាឆ្នាំឆ្លូវ

        បួសថោះអាសាឍ                ព្រហស្បតិ៍ត្រូវ

        ត្រាស់នៅរកា                     ពិសាខពិត ។

        បរិនិព្វាន                           ថ្ងៃអង្គារ 

        បរិស័ទគ្រប់គ្នា                    កើតតក់ស្លុត

        នៅខែពិសាខ                     ព្រះសម្ពុទ្ធ        

        រំលត់បញ្ចក្ខន្ធ                     នាឆ្នំាម្សាញ់ ។

        យើងបាត់ព្រះពុទ្ធ                 ទាន់សាសនា

        ធម៌ជាអាចារ្យ                     កុំគ្នាន់ក្នាញ់

        អ្នកប្រតិបត្តិធម៌                   ឈ្មោះស្រលាញ់

        ចំពោះអង្គអញ                    តថាគត ។

        បំណាច់អ្នកកាន់                  ពុទ្ធសាសនា

        ត្រូវចាំសាវតារ                    នៃព្រះពុទ្ធ

        គឺថ្ងៃខែឆ្នាំ                          ឲ្យហ្មត់ចត់        

        ទើបបានកំណត់                  ជាពុទ្ធជន ។

        ពុទ្ធកិច្ច៥យ៉ាង                    គឺអ្វីខ្លះ   

        ចូរចាំឲ្យច្បាស់                    គ្រប់រូបា

        បំណាច់អ្នកកាន់                  ពុទ្ធសាសនា      

        ត្រូវចាំកិច្ចការ                     នៃព្រះអង្គ ។

        ពេលព្រឹកទ្រង់ស្តេច             យាងបិណ្ឌបាត

        តាមផ្ទះមានញាតិ                 ឈររហង់

        ជួនមួយអង្គឯង                   ជួនមានសង្ឃ

        តម្រង់តាមសត្វ                   មាននិស្ស័យ ។

        រសៀលទ្រង់ត្រាស់               សម្តែងធម៌

        ដល់សត្វនិករ                     ដោយអាល័យ

        សត្វណាមិនយល់                ទ្រង់ឧបមេយ្យ

        បកស្រាយសេចក្តី                ឲ្យយល់បាន ។

        ព្រលប់ប្រទាន                    ព្រះឱវាទ

        ដល់សង្ឃឲ្យស្អាត                ល្អកល្យាណ

        កុំឲ្យប្រព្រឹត្ត                       ខុសលំអាន

        តាមផ្លូវដែលបាន                 ទ្រង់បញ្ញត្តិ ។

        អាធ្រាត្រទ្រង់ដោះ               ស្រាយបញ្ហា

        ដែលពួកទេវតា                   មកច្រើនក្តាត់

        សម្តែងព្រះសូត្រ                  ឬបរមត្ថ

        តាមពពួកសត្វ                    មានសង្ស័យ ។

        ជិតភ្លឺប្រមើល                     និស្ស័យសត្វ      

        តើអាចប្រតិបត្តិ                   មានកម្រៃ

        ដែលគួរត្រាស់ដឹង                ព្រះធម៌ថ្លៃ

        តាមឧបនិស្ស័យ                  សត្វលោកា។

        ៤៥ឆ្នាំ                              ឥតមានខ្វះ       

        ព្រះអង្គនឿយណាស់            លើមនុស្សា

        ឥតមានសម្រាក                  ព្រះកាយា        

        ឥតមាននរណា                   ប្រដូចបាន ។

        យើងបាត់ព្រះពុទ្ធ                 ទាន់សាសនា

        ធម៌ជាអាចារ្យ                     ទូន្មានប្រាណ

        ប្រតិបត្តិត្រង់ផ្លូវ                   ត្រូវលំអាន

        ដរាបដល់បាន                    និព្វានហោង ។    អគ្គបណ្ឌិត ប៊ុត សាវង្ស