វិសាខបុណ្ណមី

វិសាខបុណ្ណមីគឺថ្ងៃវិសេស

យើងបានចាំចេះថ្ងៃព្រះភគវា

ប្រាំពីរប្រការជ្រះថ្លាវន្ទា

វិសាខបូជាឫកពាសែនល្អ

                                ទីមួយគឺថ្ងៃសុមេធបណ្ឌិត

                                ពោធិសត្វពិតមានឫទ្ធិបវរ

                                ចាប់ផ្តើមទទួលព្រះពុទ្ធព្យាករណ៍

                                លោកធាតុញាប់ញ័រសាទរពេកក្រៃ ។

ទីពីរគឺថ្ងៃក្សត្រថ្លៃប្រសូត្រ

អស្ចារ្យរហូតសម្ពោធព្រឹក្សព្រៃ

កំណើតចុងក្រោយជាប់ដោយអត្ថន័យ

ផុតចាកភពត្រៃលែងភ័យលែងព្រួយ ។

                                ទីបីគឺថ្ងៃព្រះស្រីមហាពោធិ៍

                                ដុះចេញលេចធ្លោពោធិ៍ពិតមានត្រួយ

                                ថ្ងៃព្រះប្រសូតស្រូតដុះជាមួយ

                                ជំនួយឲ្យចិត្តបរិស័ទជ្រះថ្លា ។

ទីបួនគឺថ្ងៃចមត្រៃត្រាស់ដឹង

ថ្ងៃមានទីពឹងពំនឹងលោកា

ជាថ្ងៃព្រះពុទ្ធបរិសុទ្ធអស្ចារ្យ

ពួកជនជ្រះថ្លាចិន្តាល្អស្អាត ។

                                ទីប្រាំគឺថ្ងៃអង្គថ្លៃនិព្វាន

                                ថ្ងៃព្រះទ្រង់ញាណមានពុទ្ធោវាទ

                                បច្ឆិមវាចាថាកុំប្រមាទ                        

                                ឱវាទពិសិដ្ឋស្ថិតនៅជាគ្រូ ។

ប្រាំមួយគឺថ្ងៃប្រល័យព្រះធាតុ

ចេតិយលោកនាថនៅទៀតមិនយូរ

ព្រះធាតុទាំងអស់ហោះមកគល់ពោធិ៍

តេជោរំលាយរលត់ពុទ្ធសាសន៍ ។

 បាំ្រពីរគឺថ្ងៃជោគជ័យពុទ្ធា

                                គ្រប់ព្រះភគវាឈ្នះមារបានត្រាស់

                                នាំមកនូវសុខវិសេសខ្លាំងណាស់

                                គ្រប់អង្គទ្រង់ត្រាស់ព្រះធម៌ទេសនា ។

វិសាខបុណ្ណមីថ្ងៃប្រពៃពិត

យើងខ្ញុំមានចិត្តនឹងធឹងជ្រះថ្លា

វន្ទាសំពះអង្គព្រះសាស្តា

សូត្រធម៌ថ្វាយផ្កាបូជាប្រទីប ។

                               លោកគ្រូអគ្គបណ្ឌិត ប៊ុត សាវង្ស