សេចក្តីត្រិះរិះរបស់នាងវិសាខា

សេចក្តីត្រិះរិះរបស់ខ្ញុំថា

តើនៅពេលណាខ្ញុំបានថ្វាយទាន

នូវប្រាសាទថ្មីតាមទ្រព្យដែលមាន

ជាវិហារទានថ្វាយចំពោះសង្ឃ ។

                          សេចក្តីត្រិះរិះរបស់ខ្ញុំថា

                          តើនៅពេលណាខ្ញុំបានឱនអង្គ

                          ថ្វាយគ្រែពូកខ្នើយដោយចិត្តផ្ចិតផ្ចង់

                          ចំពោះដល់សង្ឃដែលគង់ក្នុងវត្ត ។

សេចក្តីត្រិះរិះរបស់ខ្ញុំថា

តើនៅពេលណាខ្ញុំបានថ្វាយភត្ត

ផ្សំដោយមំសៈធ្វើដោយហ្មត់ចត់

សលាកភត្តជាអាហារទាន ។

                 សេចក្តីត្រិះរិះរបស់ខ្ញុំថា

                 តើនៅពេលណាជួបព្រះទ្រង់ញាណ

                          ព្រមទាំងព្រះសង្ឃសទ្ធាខ្ញុំមាន

                          ថ្វាយចីវរទានសំពត់សាច់ល្អ ។

សេចក្តីត្រិះរិះរបស់ខ្ញុំថា

តើនៅពេលណាជួបសង្ឃបវរ

ថ្វាយភេសជ្ជៈទឹកឃ្មុំប្រេងស្ករ

ទឹកដោះគោល្អនិងទឹកអំពៅ ។

                          មកដល់ឥឡូវខ្ញុំបានសម្រេច

                          គ្រប់មុខស្រាច់បាច់ឥតមានសល់នៅ

                          ខ្ញុំបានថ្វាយទានកប់ទុកយ៉ាងជ្រៅ

                          ក្នុងដំណើរទៅកាន់ព្រះនិព្វាន ។ អគ្គបណ្ឌិត ប៊ុត សាវង្ស