ធម៌នមស្សការព្រះរតនៈត្រ័យ

បទសរភញ្ញ

    សូមថ្វាយបង្គំព្រះសម្ពុទ្ធ 

    ប្រសើរបំផុតក្នុងលោកា

    ជាគ្រូនៃមនុស្សនិងទេវតា          

    ទ្រង់ត្រាស់ទេសនាប្រដៅសត្វ ។

                                  ចង្អុលឱ្យដើរផ្លូវកណ្តាល  

                                  មាគ៌ាត្រកាលអាចកម្ចាត់

                                  ទុក្ខភ័យចង្រៃឱ្យខ្ចាយខ្ចាត់

                                  អាចកាត់សង្សារទុក្ខបាន ។

    សាសនាព្រះអង្គនៅសព្វថ្ងៃ       

    សត្វមាននិស្ស័យពីបូរាណ

    ប្រឹងរៀនប្រឹងស្តាប់ចេះចាំបាន

    កាន់តាមលំអានបានក្តីសុខ ។

                                  ឥតមានសុខណាស្មើក្តីស្ងប់ 

                                  បញ្ចប់ត្រឹមសុខឃ្លាតចាកទុក្ខ

                                  តាំងពីលោកនេះតទៅមុខ

                                  ក្តីសុខនឹងមានព្រោះធម៌ស្ងប់ ។

    ខ្ញុំសូមបង្គំឆ្ពោះព្រះធម៌

    ព្រះសង្ឃបវរទាំងគ្រប់សព្វ

    រួមជាត្រៃរត្ន័គួរគោរព

    ជាម្លប់ត្រជាក់នៃលោកា ។

                                  ព្រះរូបព្រះធាតុនៃព្រះពុទ្ធ

                                  វិសុទ្ធតាងអង្គព្រះសាស្តា

                                  សូមគុណត្រៃរត្ន័ជួយខេមរា

                                  ឱ្យបានសុខាតរៀងទៅ ។

និពន្ធដោយសម្តេចព្រះសង្ឃរាជ ជួន ណាត ជោតញ្ញាណោ ជាអគ្គមហាបណ្ឌិតបិតាអក្សរសាស្រ្តខ្មែរ